Oshipotha shomahogololo sha ekelwahi

OSHIPOTHA shoka sha li tashi kondjitha omahogololo goshigongi shopashigwana noshowo gopauperesidende ga Novomba 2009 osha ekelwahi kOmpangu yopombanda moVenduka.

Oshipotha shoka sha etwa koongundu 9 dhompilameno  ndhoka dha kana mehogololo osha ekelwahi kompangu yopombanda metompelo lyopautechnica nenge lyopamalongekidho. Aapanguli yaali oya gandja etokolo lyawo, lya leshwa kOmupanguli Peresidende, Petrus Damaseb.Aapanguli mbaka oya  ti eindilo lyoongundu ndhoka omugoyi oli na okutendwa mo melandulathano oshoka kalya  li lya etwa kompangu mondjila  nopamulandu gwOmpangu yopombanda noshowo pamautho gOmpango yOmahogololo.Oshipotha shika osha gandjwa kuAmushanga gwompangu yopombanda ethimbo lya pwapo nenge kwa tokelwa oku shi ninga ngaashi sha uthwa kOmpangu yopombanda.Ompangu oya gandja ishewe elombwelo kutya  oonaku ninga eindilo oyo ye na okufuta aakalelipo yopampango ayehe mboka ya li ya longo moshipotha shika.Kokutya oohahende dhoKommissi yomahogololo ya Namibia , noshowo ndhoka dho Swapo. Oonaku yamukula ekondjitho ndika oya li ya longitha  aatseyimpango aakuluntu montseyo yoompango  ya za  ko South Africa.Onkene oongundu dhompilameno ota dhi ka futa iimaliwa oyindji. Oshigwana oshindji osha li mompangu yopombanda sheya okupulakena etokolo lyompangu.Sho ompangu ya gandja etokolo lyawo  iilyo yoSwapo naayambidhidhi yoSwapo oya  li ya nyanyukwa taya ligola yo taya nuka kenyanyu sho oshipotha shika sha ekelwa hi.Metokolo lyawo aapanguli, Damaseb na Collins Parker oya tokola  okweekelahi oshipotha shiikwatelela  koshinima shopautechnica ndele hamolwaasho ya tala oshikalimo sheindilo  lyoongundu 9 dha li dha hala omahogololo ga   kalekwe nenge ngele hasho iizemo yomahogololo yi yalululwe.Oongundu dha ningi eindilo odho RDP, RP,Nudo,CoD,DTA  UDF,APP,NDMC, noshowo ,DPN.
Ompango yomahogololo otayi  ti omukondjithi gwomahogololo oku na oku gandja eindilo ndika omasiku omilongo 30 konima sho omahogololo  ga pu. Ompango  ishewe ota yi ti  ompangu oyi na okupulakena  shika meni lyomasiku 60.Oshipotha shika osha shangithwa 4 January 2010, na ishewe osha shangithwa kwa toka potundi 16h30 peha lyokushi shangitha pondatu[15h00]. Pamautho gOmpangu yopombanda oshipotha kehe oshina okushangithwa sigo opo tundi 15h00 esiku kehe. Ombelewa ndjika ohayi yakula ashike iinima yina  sha noku kondjitha iipotha sigo opotundi onti 16h00. Omilandu otadhi ti amushanga ota vulu okutaamba omushangwa  ngele okwa lombwelwa eshininge komupanguli. Moshipotha shika oongundu 9 dhompilameno odha lidhi na okusoshimpwiyu  kutya odha gandja uumbangi wagwana komeho gOmpangu kutya amushanga gwOmpangu yopombanda okwa mono kutya eindilo lyawo olya endelela onkene okwe li taamba konima yethimbo ndyoka lyuuthwa pampango nopalandulathano lyompangu. Ompangu oya ti oongundu ndhika ka dha li dhina okudhiladhila kutya sho Omukwatheli gwaamushanga gwompangu a taamba eindilo lyawo shika ota shi ti oshipotha shawo osha taambwa kompangu.Omupanguli Parker okwa ti oongundu odha li dhina okwiiyutha kompango noku gandja eindilo dhalyo pethimbo.Omupanguli peresidende, Damaseb  okwa zimine pamwe nomupanguli  Parker kutya oshoka ka pwa li omatompelo gopaulumompumbwe okweeta eindilo ndika kwa toka nena ndika oli na okweekelwahi oshoka ina li ningwa pathimbo lyuuthwa .
Omupanguli pereseidende Damaseb okwa ti ompango ota yi utha kutya opena okukala  ontseyo yaashoka tashi ka ningwa na ishewe kutya shoka otashi ningwa ngaashika sha dhiladhilwa nenge sha thanekwa.Oshigwana osha tegelela  ompango dhi tulwe miilonga , dho ishewe dhi simanekwe.
Opena eitulemo koshigwana kutya ekondjitho lyehogololo olina oku endelelwapo  opo pu tseyike kutya omahogololo otaga shuna mo nenge omawi otaga ka yalululwa uuna pwa monika omapiyagano nenge okukoleka iizemo noshongeyi okugandja ompito kwaamboka ya hogololwa ya tsikile nelongekidho lyo kungongapo epangelo epe.

---