Aatotimpango aape ye na okulonga yamanamo

PERESIDENDE ,Hifikepunje Pohamba okwa londodha kutya aatotimpango yo Swapo mboka ita ya longo nawa moparliamende ota ya ka ithanwako kiilonga hoka nokutulwa pevi.

Okwa lombwele iilyo yoparliamende kutya yo oya hogololwa nokayi li moparliamende yi ikalelapo yoyene, ndele oya kalelapo oshigwana.
Iilyo yoparliamende omuperesidende, okwa ti oyi na okudhimbulukwa kutya oya kalelapo oshigwana ashihe noshaamboka inaya hogolola iilyo mbika opo yi ya kalelepo moparliamende. Okwa ti oparliamende oyi na okulongithwa  onge hala lyokukonga omayamukulo komashongo ga taalela oshigwana , omashongo gehumokomeho ta li ende kashona , oluhepo noshowo omashongo galwe ga taalela, omukwashigwana kehe.
Pohamba okwa popi ndhika pethimbo a li ta egulula oshigongi iilonga shoka sha li efalemo kaana parliamende aape yoSwapo mboka taya ka tameka iilonga yawo moshigongi shopashigwana  shoka tashi ganithilwa iilonga omanga esiku lyokudhimbulukwa emanguluko inaali thika.
Aatotimpango aakulu yo Swapo oya li woo poshigongi iilonga shika oshiwike shayi.Okwa ulike kutya iilonga yuutotimpango oyi na okutalika ko oshinakugwanithwa oshinene, oshoka oyi na sha  nokuninga oompango ndhoka tadhi gumu onkalamwenyo yomukwashigwana kehe.
Pohamba okwa ti aatotimpango na ya tote oompango ndhoka tadhi  gandja ondjila koshigwana opo shi hume komeho nawa mombepo ombwaanawa ta yi humitha komeho omikalo dhonkalonawa , dha dhama moohedhi oombwanawa nokutunga oshigwana muukumwe , mombili, no mombepo yedhiminathanepo lyopashigwana.
Okwa dhimbulutha woo aatotimpango kutya oye na okukala taya gandja oshiholelwa oshiwanawa apehe mpoka ye lip o , ta ya ulike eisimaneko mwene, ondilo yopaumwene, yena evuliko noye na esimaneko lya yalwe.
Okwa dhimbulutha aatotimpango kutya oyena okutseya kutya ongundu yoSwapo oya ninga euvathano noshigwana molupe lwomanifesto yo ma 2009, naandjika oyi na okulandulwa unene tuu mokuninga oompango megumbo lyopashigwana.

---