Oshiwambo News
Aapolisi ethele ya pita eilongo lyawo lyEtonatelo lyOkoongamba
AAPOLISI yOsipesiale ayehe kumwe ye li 100 yomAapolisi mboka ya kuthile ombinga meilongo lyEtonatelo lyokOongamba pOndangwa mOshitopolwa sha Shana uule wiiwike itatu ya zi ko mewiliko lyOshikondo shOpolisi yOsipesiale yOmambathi, oya piti eilongo lyawo ndika noya pelwe oonzapo dhawo dhepito lyawo ku Kakukutu gwOpolisi ya Namibia Ndjayi Sebastian Haitota Ndeitunga mEtitano lya zi ko pOndangwa.
Omukuluntu gwOshikondo shika shOpolisi yOspesiale yOmambadhi, Komufala gwOpolisi Desiderius Shilunga, oshowo kOmanda gwOpolisi mOshana Komufala Ndahangwapo Kashihakumwa, Kaansela gwoshikandjohogololo sha Ndangwa tate Ismael Uugwanga noshowo Meya gwOndoolopa ya Ndangwa tate Naftal Andimba nAanambelewa yalwe Aakuluntu yOpolisi ngashi Inspecta Nangula Iifo ngoka oye e li Omukuluntuwiliki gwOsenda yOmadheulilo gAapolisi pOndangwa noshowo Waraanda Officer,Eino Nambahu ngoka e li Omukuluntuwiliki gwOmadhewo gOpolisi mOkapale ka Ndangwa moka nayo opo ya li poshituthipito shAapolisi yEgameno lyokoongamba mpoka nokutala sho taya pewa oonzapo dhawo ku Ndjayi Ndeitunga.
Ndjayi Ndeitunga okwa ti, kakele kayatatu mboka inaye ke shi enditha nawa, ayehe kumwe ye li 100 oye shi enditha nawa noya pita eilongo lyawo ndika nawa, yeli ngashiingeyi ponkatu yiihwapo yokutonatela koongamba nopomiyelo dhokoongamba, unene tuu ongamba ya Namibia ndjoka yi na uule woobinekilometa 824116. Ta ti oya longwa nokudhimbulukithwa iilonga yOpolisi muukwalukehe noshowo mbyoka yokoongamba ngashi mbyoka yokushiwa onkalo pokati kIikondo yi ili noyi ili yEpangelo nosho tuu, okushiwa ekondololo lyokupita piiyelo yokoongamba, okupatolola oongamba, okumona nokukelela ayihe tayi piti nenge tayiu pitithwa poongamba nenge koongama pamukalo guulingilingi, okutonatela nokukelela epito poongamba lyaantu nosho tuu shaa li paveta, okukonaakona iinima mbyoka tayi piti poomweelo dhopoongamba, nkene aayenda taya piti poongamba ye na okuyakulwa, okukonaakona nokukwata iinima mbyoka inayi pitikwa okukaliwa nayo komukwashigwana, ya longwa ya kale ye na eshiwo mokukala nokulongitha iilwiitho ngashi oondjembo niitopitha, okukaleka omaliko gEpangelo nogaakwashigwana ge li megameno noshowo okugamena aaniilonga, okushiwa uuthemba wopaveta, okufinyaafinya koongamba shoka shi li ko notashi inyenge ko, okushiwa okulesha uukaalita woshilongo nowiilongo, okushiwa Ekotampango lyoshilongo noshowo omaihumbato gOmupolisi nIikwaveta, Omukithi Omudhipagi gwo HIV/AIDS, okukutha omahokololo noya longwa wo iinima oyindji lea nokutalithwa iinima yilwe sho yi li ngashi okawe, omapangwe, omiti dhIingangamithi, omayego goondjamba nogoompanda nosho tuu, yilwe hayi vulu okukala kaakwashigwana shaa li paveta noku yi pititha pOongamba shaa li paveta.
Ndjayi Ndeitunga ta lombwele oonakupita mbaka kutya uunongo neshiwo ndyoka ya mona meilongo lyawo inali ka kala ashike lyawo yene, ihe ye ke li pe wo Aapolisi yakwawo mboka inaya mona ompito yokukala momadhewo ngaka gokoongamba. Kakukutu kOpolisi ya Namibia, Ndeitunga, ta ti wo kutya Aapolisi naya kale aavulike notaya gandja oshiholelwa oshiwanawa.
Taya longele kumwe noshigwana opo ya vule okupita nawa miilonga yawo yesiku kehe. Ndeitunga ta ti, okwa nyanyukithwa sho omadhewo gawo ga li ga kwatela mo ekonaakono lyokushanga nokulesha noshowo okuumba oondjembo. Ta kumike mboka inaye shi enditha nawa, ya kale yena omukumo noku ke shi enditha nawa moompitio tadhi ka landula ko.
Gumwe gwomoonakupita Constabela Sadrach Kazongominja, ngoka a popi pehala lyayakwawo, okwa pandula omadhewo gawo. A pandula Ndjayi Ndeitunga sho a gandja ompito yatya ngawo. Kazongominja ta ti, osha li sha pumbiwa noonkondo ku kale omadhewo gatya ngeyi molwashoka Aapolisi oyendji oya adhika taya hala okudhimbwa okuumba molwashoka ohaya kala ashike yatya oondjembo yo itaye dhi umbitha nani. Ta ti Omupolisi gumwe okwa hokolola momadhewo moka kutya hela i ihulile okuumba ondjembo momumvo 1996 sho a pitile elilongo lye lyUupolisi, nondjembo okwe ke yi umba ashike nuumvo pethimbo lyomadhewo gawo ngaka.
Moku shi uva shoka, Ndjayi Ndeitunga okwa gandja elombwele lyeendelela kOmukuluntu gwOshikondo shOpolisi yOmambathi Komufala Shilunga kutya a kale a tala oshinima shoka muule nAapolisi ya kale hayi idheula okuumba noondjembo dhawo.
“Otu na okukala hatu dheulwa okuumba ethimbo, lumwe nenge lwaali moshiwike nokuli, oshoka moshilongo muka otu li mo nOombandite, ano nOombotsotso dhi na oondjembo ndhoka haya longitha momayugo kwa homatiwa noshowo koongamba hoka, uuna taya yi ondapo niihauto, niimuna nosho tuu, nohaya umbu nokuyaha Aapolisi yetu uuna taye ya landula.
Tala ashike koshiningwanima oshitalala sha ningwa kombinga ya Caprivi kOshikandjohogololo sha Simbinda, hoka Ookawalala ya yaka oongombe nokudhihingila mo Zambia nashi ya landulwa kOpolisi yetu, oye ya langele miihwa, taya yaha Aapolisi yetu ye li yaali noku ya ehameka noonkondo. Ye li taya mono ngashiingeyi epango mOshipangelo shimwe mOvenduka, “Ndjayi Ndeitunga ta ti ngawo nokugandja ekunkililo koombotsotso kutya oshinima shatya ngawo itashi kiidhidhimikilwa we kOpolisi, onkee ngele otadhi tsikile ngawo, inadhi kiipa ombedhi uuna lumwe. Ndjayi Ndeitunga ta indile kAapolisi ye ya kale ya tonata ethimbo alihe, omutenya nuusiku uule woowili adhihe 24. Ta ti naya kale taya dhelela ethimbo alihe pOosasiona dhawo opo ya kale ya ndjanga nawa.
