Aanadiplomate miilongo yimwe taya mono iihuna

OKANGUNDU Akoparliamende kiikwapondje, egameno nepopilo oka gandja ehokololo ewinayi kombinga yonkalamwenyo yaanadiplomate yamwe ya Namibia pondje yoshilongo.Omutotimpango gwoSwapo , Lucia Basson ngoka a li a kwatele komeho okangundu haka metalelopo kiilongo hoka ,okwa gandja omushangwa hokololo moshigongi shopashigwana oshiwike sha yi.Okangundu haka oka talelepo iilongo mbyoka hakutiwa iidhigu pankalamwenyo.Etalelopo ndika olya li lya ningwa mu Kotoba 2008oku tala nkene aaniilonga modiplomate ndhika haya mwenya.

Omahala gaakalelipo ngoka ga talelwa po ogo miilongo ngaashi, Zimbabwe, Cuba,DRC,Angola, Ethiopia noshowo Nigeria, mbika oya talika iilongo iidhigu shi ikwatelela komahupilo ga yo, egandjo lyomeya, olusheno,egameno, nomakwatathano pokati koshilongo shoka na Namibia.Iinima iikwawo oya kwatelamo uundjolowele wiihuapo, elongo, iiyenditho yopashigwana, omagumbo, onkalathano, noshowo ekwatathano pokati  kaaniilonga.Egameno miilongo mbika kakele ka Zimbabwe na Cuba olya li lya monikwa kaali li nawa pethimbo lyetalelopo, omanga onkalomwenyo oyi li yina ondilo unene miilongo ayihe mbika.Okangundu oka gandja omayele kutya epangelo na li longithe ondjato yalyo yopaudiplomate oku landela aakalelipo mbaka iikulya  ngaashi uusila wepungu, osuuka, nomongwa unene kaakalelipo shilongo mboka ye li koCuba.
Okangundu okamono kutya egandjo lyolusheno nomeya  iha yi inekelwa miilongo ayihe mbika ya talelwapo.
Kakele ka Zimbabwe iilonga ayihe yilwe oya monika yina elongo lya nyayika nenge  lina ondilo lyo olya nkundipala. Shika osha thiminike aniilonga oyendji ya thige  aanona yawo kegumbo nenge ye ya tume kiilongo yilwe.Naashika ota shi  ti kutya omukuluntu gumwe okwa kala pegumbo opo a tonatele aanona.Okangundu oka ti omuthika gwelongo noshowo guundjolowele ogwa ningi omwinayi molwa omahupilo ngoka ga nayipala moZimbabwe.Omagumbo nago woo oga ndilopala moZimbabwe na ombelewa yaa kalelipo oya hehela omagumbo kondando yi li pombanda.
Iiyenditho yopashigwana miilongo ayihe mbika kayi na egameno, dho ishewe oondjila dhomiilongo mbika ayihe odhi li monkalo ya nyayika osho omushangwa gwa ulike.