Oyendji ya tegelela omagumbo

OMPUMBWE yomagumbo okupitila mehangano lyokutunga omagumbo lyopashigwana [NHE] oyi li pombanda. Ompumbwe ndjoka oyi li unene mokati kaantu mboka ya hala omagumbo ngoka ge na ondando ta yi vulika. Sigo oompaka ehangano lyopashigwana lyokutunga omagumbo olya ti omwaalu gwaaindili 3 000 ogu li momusholondondo gwaamboka ya hala okutungilwa nenge okulanda omagumbo. Aaindili mbaka oyo ashike mboka yomoshilando sha Venduka.

“Momumvo gwembo lyiimaliwa lyongashingeyi NHE ngoka ha yakula ashike mboka ye na iiyemo yopevi, ota tungu omagumbo 576, moshilongo ashihe, ngaka otaga pula kumwe oodola oomiliona,99,7” pahapu dhomunashipundi shewilikongundu lyehangano ndika, Jason Nandago.
“Omumvo gwembo lyiimaliwa ta gu ya NHE, okwa tengeneka a ka longithe oodola oomiliona 215 okutunga omagumbo 1 301 oshilongo ashihe,” Nandago a tseyitha pethimbo a popitha atoolinkundana moVenduka etitano lya yi.
Konyala omahala 990 omape otaga ka opalekwa, ga ya pombanda okuza pomahala 49 ngoka ga li ga opalekwa pethimbo lyomumvo gwembo lyiimaliwa lyomvula ndjika.
Okwa ti omumvo gwayi omahala gomagumbo ge li 725 oga li ga opalekwa nokutulwa iipumbiwa ayihe, naashika osha eta mpoka kutya NHE a longithe oodola oomiliona 392 momimvo dhiimaliwa dha 2008-2009 okuya ko 2009- 2010.
Omagumbo ngoka ga landithwa pOtjomuise moVenduka oga li ga landwa po agehe.
“Opena omusholondondo gwaaindili yomagumbo ye li oma 3 000 moVenduka amuke,” Nandago ta ti.
Egumbo lyoondunda mbali dhokulala pOtjomuise lya tungwa kehangano lya NHE ngashingeyi ota li gu pokati koodola 279 983 sigo oodola 302 663, naandika olya tungithwa kondando yoodola 4 393 mombinemeta yimwe.
Membo lyiimaliwa lyomumvo 2008-2009 NHE okwa tungu omagumbo 216 ngoka ga pula iimaliwa yoodola oomiliona 47, 6.
Pahapu dha Nandago, aayakulwa ya NHE oha ya hogolola kutya ombaanga yini yopaipindi ndjoka ya hala okulongitha ngele ta ya futile okulanda omagumbo gawo.