Ontamanana pokati kUukwanyama nOndonga

By: OSWALD SHIVUTE MONGWEDIVA

OSHIKUMUNGU shongamba pokati kUukwanyama nOndonga muuzilo wOndonga nUukwanyama, sha kundathanwa ishewe konima yomiyelo dha patwa mEtine lyoshiwike sha zi ko.

Oonkundathana ndhika dha li mewiliko lyOministeli yOmapangelo gOpaitopolwa, Omagumbo nEhumithokomeho lyIitopolwa yokomikunda omusamane Jerry Ekandjo, odha li dha kalwa kOmalelo gOpamuthigululwakalo agehe gahetatu gomOshitopolwa shoka sha kala nale hashi ithanwa Owambo.
Iikundaneki inayi ethelwa mo moshigongi moka, Minista Ekandjo a ti kutya oonkundathana odhi li dhomegumbo notadhi ningwa konima yomiyelo dha patwa.
Nonande, inatu uva shoka sha popiwa mo naanaa, oonzo dhimwe odha ti kutya oonkundathana odha li dha kukuta na inapu adhika etsokumwe mwaashoka sha li sha haliwa. Oonzo tadhi ti, molwashoka kasha li oshipu okwadha etsokumwe, opwa ningwa etokolo pu totwe Okomitiye ya thikama mIilyo yokIitopolwa yOpamuthigululwakalo yimwe, kayi shi yokOndonga nokUukwanyama yi ka konaakone mo nawa nokuungaunga nawa noshinima shika shekondjelo lyoongamba pokati kElelo lyOndonga nolyUukwanyama.
Oshinima shika shekondjelo lyOngamba pokati kOndonga nUukwanyama muuzilo wIitopolwa mbika iyali, osha zi nale tashi ungaungiwa nasho ashike osha nyengana okupotonoka. Elelo lyOndonga otali ti kutya omikunda ngashi ngoka gwEkoka naandhoka dhi li momudhingoloko, oshowo Okonghola, Omana naandhoka dhi li momudhingoloko, odhOndonga nodhi na okwiilopota kOndonga, omanga Elelo lyUukwanayama ta li ti kutya hasho nande, omikunda ndhoka odhi li kohi yElelo lyUukwanyama. Elelo lyOndonga ohali yi ko olundji hoka ngeno li ka ningile aakwashigwana yaahoka iigongi, li ya pe uuyelele kutya yo oye li kombinga yokOndonga noye na okukala tayi ilopota kOndonga. Ashike nee ohali tidhwa ko kwaamboka ye li hoka, taya ti kutya yo oye li kohi yElelo lyUukwanyama, nElelo lyUukwanyama osho hali ya lombwele kutya yo oye li kohi yalyo, na kaye li kohi yElelo lyOndonga.
Mu Maalitsa 2004, Ombelewa yOmupresidende, pethimbo ndyoka Omupresidende Sam Nujoma, oya yile mo moshikumungu shika shongamba yUukwanyama nOndonga. Tayi unganeke nawanawa, Omukwaniilwa gwOndonga tatekulu Immanuel Kauluma Elifas nOmukwaniilwa gwUukwanyama nakusa tatekulu Kornelius Shelungu nOmalenga gawo gamwe, ya tse kumwe noya shaine etsokumwe lyawo kutya Ongamba yUukwanyama nOndonga muuzilo wOkongo moka nayi ukilile ndele tayi tsu mOshuudhiya moongamba dhokOvango nOwambo. Sho nee oshitopolwa shomuumbugantu wOshuudhiya, sha ya sigo olwokoTsintsabes lwaahoka, tashi kala shOndonga naashoka shomUumbangalantu wOshuudhiya, sigo omongamba ya Namibia na Angola, tashi kala shUukwanyama. Nonando Omukwaniilwa gwUukwanyama nakusa tatekulu Shelungu a li a shaina euvathano ndyoka, ano ngeno ongamba yi kale ngawo, Iilyo yElelo lyUukwanuyama oyindji inayi tsa kumwe neshaino ndyoka, noye li pataneke noonkondo. Taya shangele wo nokuli Oombapila kOmbelewa yOmupresidende moka taya pataneke eshaino ndyoka. Taya ti Omukwaniilwa Shelungu okwe ya nwa po. Pokati mpoka, Elelo lyOndonga olya kutha ko oongaku moonkembadhala dhokukutha ko omikunda dhokoshitopolwa shoka, ndhoka tali ti kutya odhi li kombinga yOndonga. Ashike onkee tashi kondjithathana nosha eta mpoka oshikumungu shekondjelo lyongamba pokati kOndonga nUukwanyama koshitopolwa hoka, shi shune ishewe miipundi, ngashi nee tashi kundathanununwa ishewe ngeyi.
Okamufofoto ke li po, otaka ti kutya mboka yokUukwanyama oya hala oshitopolwa shawo shuunene wOkilometa omilongontano momutamo nookilometa omathele gaali lwaampoka muule, ye shi pelwe aniwa kElelo lyUukwangali mOkavango oomvula dha zile ko. Oshitopolwa shika kombinga yokuumbugantu, osha pita kombanda yOndonga, nokuuva nee, Elelo lyOndonga olya tokola nale kutya lyo itali pitike oshinima shoka, shUukwanyama tau londo kombanda yOndonga muuzilo wOndonga moka.