Omunambelewa gwiilonga yaagundjuka yopashigwana a kwatwa

OKOMMISSI yokukeelela iilonga yuulingilingi[Anti-Corruption Commission] oya kwata omunambelewa gwiilonga yaagundjuka yopashigwana, aniwa sho a li ta pula a futwe ombumbo.

Omunambelewa okwa kwatwa pethimbo lyoshilangela sha longekidhwa kokommissi ndjika. Okwa kwatelwa mepandaanda Lyemanguluko moVenduka, moshitopolwa shoongeshefa dhopokati koshilando.
Ekwato lye olya hili aatilinawa oyendji mboka ya li popepi mepandaanda ndika, sho aniwa omunambelewa nguka a li ta kambadhala okwiikanyuna oonakumukwata.
Omuwiliki gwo Kommissi, Paulus Noa okwa lombwele oThe Namibian kutya omufekelwa nguka aniwa okwa kambadhala okupewa ombumbo yoodola 5000 na okwa kwatwa mbala konima yaashika sho a pewa iimaliwa mbika okuza kehangano lyoassurance.
Othe Namibian oya tseyithilwa shu ukilila kutya omunambelewa nguka oha longo moshitopolwa shokulanda nokukonga omayakulo miilonga yopashigwana yaagundjuka.
Okwa itaalwa kutya NYS oha kwashilipaleke omaliko ge ogendji nehangano ekwashilipaleki lyedhina GlenRand Insurance Brokers. Omunambelewa nguka aniwa okwa kambadhala opo a pewe ombumbo ye a tsikile okugandja iilonga yokukwashilipaleka oyindji kehangano ndika.
Omuniilonga gwehangano ndika okwa ka tseyithila okommissi yokukondjitha iimbuluma oshinima shika, okommmissi oye mu pe oshimaliwa opo eke shi pe omunambelewa nguka omanga yo ye li moshilangela ya tegelela eshi taambe ye, opo a kwatwe.
Omuwiliki gwiilonga yopashigwana yaagundjuka, Onesmus Upindi okwa lombwele oThe Namibian kutya nonando okwa tseyithilwa oshinima shika ye oku li moshigongi iilonga na ota ka konakona shika ngele a galukile kombelewa ye mbala.