Namibia okwa hala okujoina OECD

NAMIBIA okwa hala okuninga oshilyo shehangano lyelongelokumwe momahupilo noshowo mehumukomeho.[OECD].

Omuwiliki gwokommissi yomathaneko gomapendulepo ya Namibia, Peter Katjavivi okwa koleke onkatu ndjika pethimbo lyoshigongi shomasiku gaali pokati kaatumwakalelipo yUukumwe waEuropa naamboka yepangelo lya Namibia moVenduka.
Katjavivi okwa ti Namibia ota ,katuka oonkatu dhokomeho okutula miilonga eigidho lyomoParis.
Eigidho ndika lyomoParis lya kolekwa mu 2 ga Maalitsa 2005, olyo euvathano lyopaigwana ndyoka hali simanekwa nokwiiyuthwa kulyo koominista dhi vule 100, noshowo kaawiliki yomahangano .Mbaka otaya longo opo ya agandjaneke elongelokumwe neyukitho mondjila lyiilalakanenwa yawo.
“Tse otwa gandja ethaneko lya Namibia opo a taambelwe mongundu ndjika.Okukala oshilyo ota ku ka etela oshilongo shetu uuwanawa owindji, ngaashi kutya ota tu mono aantu yena uungomba opo ye tu kwathele mokutula miilonga eigidho neuvathano ndika.Tse ota tu taamba eyambidhidho kehe oku za kUukumwe waEuropa.” Katjavivi a ti.
Katjavivi okwa ti omolwa onkalo yomahupilo ganyaika muuyuni Namibia okwa pumbwa ekwatho tali longitha oonkatu dha pitilila.
“Onkene otwa pumbwa oonkatu, dhomuule, dhopashinanena, opo kehe oonzo ndhoka dhili po dhi vule okulongithwa muuwanawa waantu ya Namibia.
Katjavivi okwa longitha ompito ndjoka opo a halele Uukumwe waEuropa elago molwa etokolo lyawo okunenepeka olutu ndoka noshowo, sho lwa hogolola omuperesidende, Herman van Rompuy gwa Belgium noshowo ominista, Yiikwapondje, Catherine Ashton gwokoBritania.
Okwa ti elunduluko ndika lya ningwa mUukumwe waEuropa olya adha omalalakano ogendji naashika otashi talikwa nomeho omanene kuAfrica.
Okwa ti ekoko nenepalo lyUukumwe waEuropa ota li humitha komeho ombili, negameno muuyuni, ngaashi osho shili elalakano lyiigwana ya hangana.
Oonkundathana ndhika odhina elalakano okutala kutya oompito dhini po ndhoka Uukumwe waEuropa naNamibia ye na ,natango oku tala melongelokumwe.Oonkundathana ota dhi talulula woo ekwatathano pokati komalutu ngaka gaali.