Naku kotokela oSocial Security a pewa oomvula ntano

NAKUFEKELWA omunene mekotokelo lyoKommissi yonkalonawa[SSC] ndyoka lya li lya monikwa momumvo 2006 okwa pewa egeelo lyokukala mondjedhililo oomvula ntano.

Maxwell Spanneberg okwa pewa egeelo lye konima sho a zimine ondjo ye momatamaneko ge li 87 gekotokelo.Mengestrata, Sarel Jacobs okwa tseyitha mompangu yoshitopolwa ya Venduka kutya Spanneberg ota geelwa noomvula heyali mondholongo.
Oomvula mbali dhegeelo lye odha kuthwa ko, opo muule woomvula ntano kaa uvikile, nenge a kwatwe molwekotokelo, pethimbo oomvula ndhoka dha kuthwa ko inaa dhi pwako.
Spanneberg oye omutamanekwa gwotango moshipotha shaatamanekwa ayehe kumwe 63 mboka taya tamanekelwa uulingilingi, nenge ekotokelo ndyoka lya kwatelamo ekano lyoodola konyala etata lyomiliona.
Spanneberg okwa zimine kutya oku na ondjo konyala oomvula ndatu konima sho ekotokelo ndika lya ndhindhilikwa mu Novomba 2006. Okwa ti oku na ondjo komatamaneko 87 gekotokelo eshi itaale mu 8 Desemba 2009.
Okwa zimine kutya okuza mo 20 Kotoba 2001 sigo 22 Auguste 2006 okwa kotokele oSSC iikando 87 sho a gandja omaindilo gomafudho guuwehame giilyo yokommissi opo ga futwe, nonando okwa li eshi shi kutya ngoka kage shi goshili.
Iimaliwa ayihe kumwe mbyoka oSSC ya kanitha oyo oodola 440 470,83 sha pitile mekotokelo ndika.
Spanneberg okwa lombwele mengestrata, Jacobs kutya ye okwa pewa oshititatu shimwe shiimaliwa mbyoka.
Okwa ti woo okwiilongekidha oku gandja uumbangi miihokolola yaatamanekwa ooyakwawo mboka natango ya tegelelwa okuholoka mompangu kombinga yoshinima shika.
Pethimbo ta gandja egeelo ku Spanneberg, mengestrata, Jacobs okwa endulula ehokololo lya Spanneberg ndyoka a li a gandja ta ti oshinima okwe shi ningithwa komalovu , noshowo kiingangamithi mbyoka ye a li ha longitha okuza 2001.
Okwa ti shika ota shi ulike kutya, Spanneberg okwa longitha iimaliwa mbyoka opo a futile onkalamwenyo ndjoka a li itaa vulu okufutila meni lyondjambi ndjoka ye a li ha mono.
Ekotokelo epogolo enene , unene tuu ngele olya longwa komuniilonga eli longele omugandji gwe gwiilonga, osho mengestrata, Jacobs a lombwele, Spanneberg.Okwa ti manga,Spanneberg a li a inekelelwa, koSSC , ye okwa longitha ehala lye nayi nokuyona po iimaliwa yoshigwana.
Oshigwana osha tegelela uuyuki okuza kaanambelewa mboka ye li pomahala y inekelelwa po, mengestrata ta ti.
Spanneberg okwa kotokele oSSC nomwaalu omunene uule wethimbo, osho mengestrata a ulike.
Okwa ti okuza ethimbo ndyoka, Spanneberg a longo shika sigo uuna ndoka iilonga ye yaholoka puuyelele pehulilo lyomumvo 2006, nakupogola okwa li ta vulu okwiitedhulula eti igaluluka.
Ndele shika ye ine shi ninga. Spanneberg okwa kala a manguluka pondje sho iifutilemo noodola 15 000 okuza muDesemba 2006 sigo oosho a zimine ondjo ye omumvo gwa ziko, konima mengestrata okwa gandja elombwelo kutya na shune mondholongo sigo uuna a pewa egeelo lye.
Iihokolola yoonakupogola pamwe naye ya hupa ko oya thanekwa yi ka tameke mompangu yoshitopolwa yaVenduka mu 6 May 2010.
Spanneberg okwa li a kalelwapo komukalelipo gwopampangu, Jan Wessels, omanga Simba Nduna oye a li a kalelepo epangelo moshipotha shika.