Zambia ta tungu oshitaasi oshipe sholusheno

ZAMBIA okwa thaneka okutunga oshitaasi shimwe oshipe sho kudhiga olusheno omumvo tuuka. Oshitaasi shika otashi ka gandja olusheno koshitopolwa shoomina unene ndhoka dhongopolo.

Omuwiliki gwehangano lyoonkondo lyopehala lyongopolo[Copperbelt Energy Corp], Michael Tarney okwa ti oshitaasi shika ha shi longitha omeya otashi tungwa pomulonga gwa Kabompo, notashi ka dhiga olusheno lwoomegawatt 40. Otashi tungwa moshitopolwa shi na uuyamba wongopolo muumbangalantu ninginino wa Zambia.
Oshitaasi shika otashi ka pula oodola dhAmerica 120 opo shi pwe okutungwa.
Otaku tiwa olusheno talu ka pumbiwa koomina moshitopolwa moka olwoonkondo dhoomegawatts 1 000 moomvula ntano tadhi  landula, oku za poomegawatts 800 ndhoka hadhi longithwa ngashingeyi koomina. Pethimbo ndika opena iilonga iipe yoomina mo Zambia ta dhi tungwa konima sho ondando yongopolo ya tameke okulonda pombanda.
Tarney okwa lombwele oshikundaneki sha Reuters kutya ehangano lye oli ipyakidhila noku tala kutya oludhi luni lwo shitaasi shika talu ka longithwa, opo ehangano lyi thaneke oshitaasi shoshene omanga inaa ku yiwa pehulilo lyonuumvo.
Okwa ti ota ya ka ninga etseyitho muuyuni okukonga mboka ya hala okutunga oshi taasi shika, konima ngele iilonga yoku shi thaneka ya manithwa.Okwa ti oya tegelela omahangano ga za ko China, ko Europa na South Africa ga ulike ohokwe yoku tunga oshitaasi shika.
Okwa ti oshitaasi osha tegelelwa okutulwa miilonga momumvo 2015.
Moshitopolwa moka omuna oomina dha Lumwana na Kansanshi, muumbangalantu uninginino, noshowo dhilwe.
Omahangano gamwe gopaigwana haga longele moZambia  ogo, Canada’s First Quantum Minerals, Vedanta, lya shangwa mo London, Equinox Minerals, Metorex lya South Africa na Glencore lyopaigwana lya Switzerland.

---