Opolisi ya dhenge okamatyona moluufuthi

YINA yokamatyona okanamimvo 11 kedhina Kensley Schultze hoka taka tamanekelwa eyako lyondjato yoskola okwa kundanekwa ke ehamekwa kaanambelewa yaali yopolisi. Anna Magrieta Schultze ngoka a li lela tu ulike a kumwa okwa lombwele oshifo shoThe Namibian kutya aanambelewa yaali, gumwe ogwopolisi yamuni gwaVenduka omanga omukwawo ogwetanga lyopolisi yaNamibia oya hangene okamatyona hoka noku ka dhenga nee ngaaka.

Olopota okuziilila kundohotola oyu ulike kutya kamatyona ngoka okwe ehamekwa kolupanda lwokokumoho, kombunda, komatako osho wo nee komatundji. Okamatyona hoka okwa kundanekwa ka tulila mo aanambelewa mboka yopolisi oshipotha nokuli.

Omupopiliko gwopolisi yamuni Helena Mootseng okwa koleke shoka nokwa ti opolisi yaNamibia oyi li tayi konakona oshiningwanima shoka. Mee Schultze okwa ti okamonamati oka gumwa lela pamadhiladhilo kedhengo ndyoka.

“Oto ka dhenge okamatyona ke thike mpono ngiini? Okanona kandje kokamati oka li ka hala oku ka ninga omupolisi nenge ka ka longele koshikondo shokukondjitha omililo ashike ondjodhi yako ngashingeyi oya kana po thiluthilu molwashoka ka ningilwa. Okwa kundanekwa kutya gumwe gwomwaamboka ya longele kamatyona ngoka iilonga ya fa mpoka oye !Gawagab, gulwe oye anuwa Pius naangoka a li te ya wilike oye anuwa Kalep.

Oonkambadhala okumona omadhina gu udha gaamboka kopolisi yamuni osho wo kopolisi yaNamibia inadhe e ta po uuyelele washa shaashi inaa dhengulula we ngaashi ya li yu uvaneke. Okwa kundanekwa Kensley nookuume ke ya li taya dhana etanga lyokoompadhi poAfter School Youth Centre poGrysblok koKatutura mOvenduka nosenda ndjoka okwa kundanwa ye e twa po kepangelo okunkondopaleka onakalathano pokati kaanona aaNamibia.

Omulongiskola ngoka oye a li po pathimbo ndyoka Else Keddy okwa ti kamwe komumentu oka ka lopota kutya ondjato yako oya yakwa po. “Kanda li ndishi kutya ne ninge ngiini nondi ithana opolisi yi ye yi pule nawa nokutilitha ngaa okamatyona hoka. Onda ka kumwa nee sho aapolisi mboka ya kutha kamatyona ngoka noku mu fala mokandjugo nokutameka nee taye mu dhenge omanga taye mu pula kutya ondjato oyi li peni.

Onda kambadhala oku ya lombwela yaa ninge ngaaka ihe oye edhile ashike omweelo gwokandjugo nokulondodha ndje ndaa ye mo.

Onda li ndu uvite lela nayi”, Keddy a yelitha ngaaka nokugwedha po kutya opolisi oya monitha kamatyona ngoka iihuna uule woowili mbali lwaampoka. Keddy okwa ti okuza mpoka okwa tameke ta limbililwa ashike ka li nee e shi kutya na dhengele ishewe lye shaashi mboka taa ningi ngaaka aapolisi nayo. Kensley ngoka kwa kundanekwa e ehamekwa komutse okwa ti ina ningilwa natango oshinima oshitilithi sha fa mpoka monkalo ye. “Opolisi oya dhenge ndje nomapaya nokuthanga ndje. Sho nda kala te ti hangame okwo wo kokudhengwa kwa kala taku ningi okundji noonkondo. Onda kala nokulila opo ngaa andola yaa ninge we ngaaka ashike oya lombwele ndje ashike kutya otaya fala ndje koosela dhopolisi. Shika nda ningilwa osha tilitha ndje noonkondo. Okuza mpoka onde ya lombwele kutya ondjato ongame ndi yi na noyi li kegumbo opo ashike ya vule okufala ndje kumeme nakuku kegumbo”, omunamimvo 11 osho a yelitha ngawo. Kensley okwa ti yinakulu omo ye mu adha megumbo sho opolisi ye mu fala ko nayinagona okwa lombwele aapolisi kutya ka ye na uuthemba oku mu dhenga ngaaka.

“Ngele oshoshili kutya omunambelewa gwetu oku na ondjo, otatu ka longa naye nawanawa. Otwa pandula wo sho Schultze a lopota oshiningwanima shoka nomokuninga ngaaka otatu mono kutya omayakulo moshigwana otatu ga gandja ngaa nawa nenge ongiini.

Tse otu lile po okuyakula oshigwana na hakukala ashike tu li ompinge nasho ethimbo kehe. Opolisi yaNamibia otayi konakona oshiningwanima shoka ihe natse yopolisi otatu ke shi ningila omakonakono.

Otatwi indile oshigwana shi kale hashe e ta omakemo gasho kombelewa yetu onene”, Mootseng a yelitha ngawo.