Swartbooi a kondema omadhipago moshilongo

NGOLONEYA gwoshitopolwa shaKaras omusimanekwa Bernadus Swartbooi okwa kondema lela omadhipago nomamonitho giihuna aakiintu naanona moshilongo. Ndhoka Swartbooi okwe dhi popi sho a li ta taamba ko oshimaliwa shi thike N$355,000 okuziilila maanangeshefa osho wo oohandimwe peha lyopolisi yoshitopolwa shoka shaKaras kwa tegelelwa shi ka kwathele muudhano mboka tawu ka kala ko woSouthern African Regional Police Chiefs Cooperation (SARPCCO) mboka kwa tegelelwa wu ka tameke momasiku 19 Auguste. Mokukondema omadhipagathano moshilongo ngoloneya Swartbooi oku ulike koshiningwanima shoka shedhipago lyomukiintu omunamimvo 19 ngoka kwa kundanekwa a tsuwa sigo eso kwaangoka kwa kundanekwa ya li miihole naye kOutjo. Gavena Swartbooi okwi indile koshigwana shi gandje omayakulo kunkene omamonitho giihuna aakiintu naanona ga hulithwe po meendelelo. Omutamanekwa ngoka kwa kundanwa i igandja yemwene kopolisi ota tamanekelwa edhipago lyomukiintu ngoka nokwa li ashike pondje yondholongo sho a li i ifutile mo sha a dhipagele okamonamati komukiintu oye tuu ngoka a dhipaga ngaaka.

“Natu puleni omapulo kutya ongiini ano pu na oku ungaungiwa naalongi yiimbuluma ya fa mpono? Ngoloneya a pula ngawo nokugwedha po kutya okutula aalongi yiimbuluma miipandeko, oku ya pa omageelo osho wo oku ya tula momanzulonkalo osha fa itaa she e ta po omalunduluko. Omikalo ndhoka hadhi longithwa ngashingeyi kaakalekipo yooveta nomalandulathano otadhi longo tuu?, Bernadus Swartbooi a pula a yelithilwe ngawo. Okwi indile oomangestrata naanambelewa ayehe yoshikondo shuuyuki ya tale po nawanawa pokugandja omapitikilo kaagandji yiimbuluma yi ifutile mo mokakuma.

“Oveta oya simana noyi na aluhe okwi iyuthwa kuyo nokunimgilwa ethindilomo pambepo naanaa yopamutumba gwoparliamende ngoka gwe yi pititha ashike omadhipago gaakiintu naanona nago ogu uka nee pombanda noonkondo”, Swartbooi a ti ishewe ngawo. Swartbooi okwa pandula nee mboka ya yambidhidha pashimaliwa uudhano mboka woSARPCCo pashimaliwa ngaashi omunangeshefa gwoRosh Pinah Ronnie Coleman, Puma Construction, PE Minerals, Super Sand, Noordoewer FNB branch, Brukaros Meat Processors, Karasburg Rob Motors osho wo nee Noordoewer Oranje Winkel.

Okwa kundanekwa epangelo nalyo lya yambidhidha ko ngaa kuudhano mbuka sho lya gandja wo N$1000, oonzi dhi li ntano osho wo okamenye. Sho a li ta popi poshituthi opo tuu mpono komanda gwopolisi gwoshitopolwa shoka shaKaras Armas Shivute okwa ti aapolisi inaya kala nando haye etele aalongi yiimbuluma ohenda.