Iipotha yawo ye ethiwa mompangu

IIPOTHA ya li ya tulilwa mo aalumentu yatano ya tulilwe miipandeko shi na sha neyugo kwa homatiwa moka oshimaliwa shoomiliona dhoodola dhaNamibia mbali oshinkwanu mbali (oomiliona N$2,2) dha li dha yakwa omunangeshefa omuLebanon koKlein Windhoek osho ya kuthwa mo mompangu yamangestrata gwaVenduka. Shika shokuyuga kwa homatiwa osha li nee sha ningilwa anuwa koKlein Windhoek mmuMai omumvo gwa zi ko.

Sho nee omakonakono goshipotha shawo inaaga pwa sigo okeluwa ndino, omupevitamanekindayi Jackson Kuutondokwa okwa gandja elombwelo kutya iipotha mbyoka tayi tamanekelwa aalumentu mboka nayi kuthwe mo nomutamaneki Samantha Diergaardt osho a lombwele mangestrata Justine Asino sho yane yomaalumentu mboka ya holokele komeho gompangu.

Gumwe gwomwaamboka taya tamanekelwa shoka Eliaser Amukoto ‘Kambau’ ka li a holoka komeho gompangu shaashi anuwa okwe ehama noonkondo moshiponga shoshihauto nokuli ta mono eyakulo lyopaunamiti moshipangelo shimwe kOngwediva, mangestrata osho a lombwelwa ngaaka.

Mangestrata Asino okwa tseyithile ooyakwawo mboka taya tamanekelwa shoka ngaashi Josia (‘Zorro’) Muhongo, Michael Shidiwe, Cheguevara Mupopiwa osho wo nee Nestor Kashuupulwa kutya iipotha mbyoka ya li taya tamanekelwa oya kuthwa mo niimaliwa mbyoka ya li ya futwa yeifutilomo mondholongo otayi shunithilwa mboka ya li ye yi futu.

Oshipotha shaalumentu mbaka osha li shu undulilwa komeho lwahugunina opo andola omakonakono ga pwe nawanawa konima sho ya holokele komeho gompangu oomwedhi ne dha piti po.

Aalumentu mboka yatano oya li taya tamanekelwa iipotha yokuyuga kwa homatiwa osho wo osho wo okwiifethitha ya fa oshilyo shetanga lyopolisi yaNamibia moshiningwanima moka omunangeshefa omuLebanon Vicken Kaprelian taku popiwa a yugwa kwa homatiwa oomiliona N$2,2 pegumbo limwe koKlein Windhoek omasiku sho ga li 16 Mai omvula ya zi ko.

Okwa kundanekwa Kaprelian a li megumbo naMuhongo ngono a tile muJuni omvula ya zi ko kutya ye naKaprelian oya li ye na okukala noshigongi naShidiwe shi na sha nompito yokulanda olisinisa yokukonga mpoka pu na omahooli kuShidiwe. Eyugo ndyoka kwa homatiwa okwa popiwa lya ningwa konima sho ongundu yaalumentu yane yi ile pegumbo mpoka nokutseyitha kutya yo aanambelewa yopolisi notaya konakona iilonga yaa li pampango. Konima gumwe anuwa okwa thigi po egumbo e na okashako hoka Kaprelian a li a humbata ke na oomiliona N$2,2 koomuma kwa popiwa ngaaka.

Shidiwe okwa tulilwe miipandeko pwa piti ashike esiku limwe konima yoshiningwanima omanga Amukoto, Mupopiwa naKashuupulwa ya kwatelwe pwa pita oomwedhi mbali lwaampoka. Kashuupulwa naMuhongo mboka ya li aapolisi pethimbo ya tulilwe miipandeko oya ti oya li ya kumwa noonkondo noku uva lela nayi sho iipotha yawo ye ethiwa sho yu uvite lela ya luudhikwa kokukwatwa po kwawo osho wo okutala yilwe yopaveta.

Mupopiwa okwa ti okwa kala nale te shi popi okuza ngaa nkene a tulilwe miipandeko kutya ye ke na mo sha meyugo ndyoka kwa homatiwa. Okweetha po iipotha yawo mbyoka inaapu ningwa naanaa etokolo mwaashika otashi ti opu na ompito ya ka tamanekwe natango ngele ombelewa yomutamanekindjayi ya ka ninga etokolo ya tamanekelwe iipotha ya faathana.

Muhongo okwa li kondje yondholongo sho i ifutilile mo N$30,000. Shidiwe naAmukoto oyi ifutilile mo nooN$20,000 kehe gumwe omanga Mupopiwa naKashuupulwa ya li wo kondje yondholongo sho ya li yi ifutilemo kehe gumwe nooN$5,000.

Oshi 2