Oofaalama ndatu dha kuthwa oondhalate mOhangwena

Oswald Shivute

Oofaalama ndatu dha kuthwa oondhalate mOhangwena

Oshitopolwa shoka shaNdjele osha fa shi li moombata pokati kelelo lyOndonga nelelo lyUukwanyama. Elelo lyUukwanyama olya kala tali ti kutya oshitopolwa shoka oshalyo omanga lyaNdonga pokati mpoka lya ti Oshitopolwa shoka osha lyo.

Osha fa nee shi li ngeyi kutya Wapulile, Valombola naIyambo mpoka ye li mpoka oya langekwa komalenga gokombinga yUukwanyama. Ya adha po nee aniwa mboka ya langekwa po wo nayo kelelo lyUukwanyama noye ya tula meni lyoondhalate dhawo. Mokati kaamboka ya tulwa meni lyoondhalate dhoofaalama ndhika omwa kwatelwa wo limwe lyomomalenga omanene gUukwanyama tatekulu Josef Michale Holongo.

Omuwiliki gwopevi gwopashitopolwa muuministeli womavi moshitopolwa shaHangwena Samwel Amutenya pamwe noshilyo shelelo enene lyomavi moshitopolwa shaHangwena meme Johanna Shanyengana otaya ti kutya elelo lyUukwanyama olya nyenyeta kutya moshitopolwa shomaulithilop shaNdjele omu na aantu ya kambako omahala gomaulithilo nokukwatela mo mookamba dhawo aanafaalama nenge aanamapya yomoshitopolwa shoka.

Amutenya ta ti ngashi omusamane Wapulile okwa kambaka okuti nenge ehala lyomulithilo lyaayehe lyoohekta 4354.08. Valombola olyoohekta1281 omanga ndyoka lya Iyambo lyoohekta aniwa 1076.635.

Amutenya ota ti aanafaalama mbaka oya pelwe oombapila dhoku ya lombwela kutya ookamba ndhoka oye dhi ninga shaa li paveta na naye dhi kuthe po. Ta ti ombapila ndjoka ye yi pelwe muAuguste omvula ya zi ko, noya li nee ya pewa ashike omasiku omilongo ndatu (30) ya kale ya kutha po ookamba dhawo ndhoka, ye dhi ningile po unene okuza ngaa momumvo 2005. Amutenya ta ti nonande ya monene elombwelo ndyoka inaya za po, yo ishewe inaya yamukula ko sha kombapila ndjoka ya pelwe kelelo enene lyomavi moshitopolwa shaHangwena.

Amutenya ta ti molwashoka inaya yamukula ko sha kombapila ndjoka, oshe ya ningitha ya kale ye na ondjo moshinima shika, nelelo olya li ashike li na oku ya kutha po kethiminiko, ya ze po mpoka, ngashi nee sha ningwa ngawo. Amutenya ta ti ina ye ya lombwela kutya otaya ka hanagula po oondhalate dhawo okuza Etine lyoshiwike sha zi ko, oshoka inashi pumbiwa we oya pelwe elombwelo pambapila ya kuthe po oondhalate dhawo omvula ya zi ko.

MEtine nee ndyoka lya zi ko, elelo lyUukwanyama lya kalelwa po kelenga Holongo, pamwe naanambelewa nee mboka yomavi yooHamutenya nopolisi kumwe nookaampani mbali ndhoka dha pewa iilonga yokukakutha ko oondhalate ndhoka, oya yi kOndjele hoka nokwa gandjwa elombwelo kookoontraka ndhoka dhi kuthe ko oondhalete, nodha tameke oku dhi kutha ko.

Amutenya nameme Shanyengana otaya ti kutya moshitopolwa moka omu na natango aanafalama ye li yaheyali (7) lwaampoka, mboka oondhalate dhawo nadho dhi na okuhanagulwa po meendelelo ngashi tashi vulika molwashoka nadho kadhi li po paveta mpoka dhi li.

Mokumonathana nagumwe gwomaanafaalama mbaka tate Onesimus Valombola, ota ti kutya ye pehala mpoka e li okwa pewa po kelenga lyUukwanyama tatekulu Holongo momumvo 1998 ye ta tula ko nee ondhalate ye momumvo 2001. Tate Valombola ota ti nee kutya ombapila kutya na ze po okwe yi mona nokwe yi fala kuhahende gwe ngoka e li ta konakona oshinima shika manga pethimbo ndika. Valombola ota ti kutya kehe ngoka ta ka kwata ondhalete ye, te yi kutha po ngawo, na kale i ilongekidhila ompangu. Tate Valombola ta ti mpoka ngaa taou hulile uuthemba waangoka te yi kutha po opo tapu tameke we. “ Sigo oompaka inandi mona ombapila yopaveta, ano yopampangu, ndjoka tayi ti nandi ze po pehala mpoka. Ngele onde yi mono.

Kandi na uudhigu okuza po. Ashike ngele inandi yi mona, kapu na ngoka e na uuthemba wokukutha ndje po nenge okukutha ko ondhalate yandje,” Valombola ta ti ngawo.

Inandi vula okumonathana natate Wapulile nosho wo tate Iyambo pethimbo oshinyolwa shika tashi yi komanyanyangidho.

Shika osho oshikando shotango elelo nenge epangelo tali katuka onkatu nokukutha ko oondhalate dhaanafaalama koofaalama dhawo ndhoka taku tiwa kutya kadhi li paveta miitopolwa yaayehe.