Omusitagongalo gwaEheke (ELCIN) a tokola oku ya kOvenduka nombasikela

Oswald Shivute

Atokola okuya kovenduka nokambasikela ke haka

Omusita Shiimi, ngoka e li wo omupehatonatelishitayingeleki shaNgwediva, ota ti kutya oya gongela po nale oshimaliwa noya tameka nale niilonga yokutunga etungo lyongeleka ndika, ashike oya kambela ko natango oshimaliwa shokumanitha etungo lyawo ndika. Omusita Shiimi ta ti okwa tokola nee oku kutha ombinga megongelo lyoshimaliwa pamukalo gwokuya nombasikela kOvenduka. Ta piti mOshomeya, mOtavi, mOtjiwarongo, mOkahandja nokuthika nee mOvenduka moka a hala okukaninga oshigongi shopasumina naakwanegongalo yaHeke nosho wo ookuume yomagongalo galwe nelalakano nee lyokugongela oshimaliwa sha gwedhwa po shokumanitha etungo lyongeleka yawo pEheke mpoka.

Omusita Shiimi okwa li e na okuya mondjila nokathanguthangu ke haka ongula yEtiyali lyoshiwike shika. A li a tokola ngeno okuziilila pombelewa yongeleki yaELCIN pOniipa mpoka, ashike aakuluntu yongeleki mpoka oya ti okwa fa ini ilongekidha nawa. Taya ti okwa fa i itula ondjila oye awike, ke na ngoka te mu kwatha uuna a mona nande oshiponga. Taye mu lombwele kutya okwa pumbwa okwi ilongekidha nawanawa uuna ta kutha oshinano oshile shondjila ndjoka.

Omusita Shiimi okwa li a taamba ko ekumagidho ndjoka, nonando sha li ngaa she mu uvitha nayi kashona, oshoka okwa adhika a tokola toko okwi itula ondjila ye ngashi a li e yi tokola okuya kOvenduka nokathanguthangu ke.

Sho e ya pOniipa mpoka ongula onene yEtiyali, a li ngeno okuya melila lyondjila pomugoyi gwongula lwaampoka, okwa li a thindikilwa komukulukadhi gwe meme Elina Shiimi nokahanona kawo komwedhi gumwe Markus Kambata Shiimi nokomuleli gwako mee Fredrika Walter nosho wo komukuluntugongalo tatekulu Julius Namutenya, kaansela omukulu gwUukwiyuushona tate Peter Shigwedha nokaakwanegongalo wo yalwe. Opwa li wo oonakutalakonawa yalwe, ya li ye ya okutala nkene omusita Shiimi ti idhenge ondjila ye ndjoka, nonande nee inashi ka ningwa we esiku ndyoka ngashi a li e shi thaneka.

Pokati mpoka otwa kundana kutya olweendo lwe onkene talu yi komeho, nomusita Shiimi okwa lombwela The Namibian kutya otayi komeho nolweendo lwe nduka ongula yonena. Ta ti komatango ota thiki mOshomeya moka ta lala nota penduka mo ngula ongulonene a thinda kOtavi nOtjiwarongo hoka ta ka lala nokupenduka ongula yOlyomakaya, a ka thike nawa kOvenduka kongulohi yOlyomakaya ngoka twa thinda. “Ondjila onde shili, ashike ondi itula momake nomegameno lyaTate Kalunga nondi wete kutya pasilohenda lye ota kala pungaye, ta pendje omukumo nokugamena ndje mondjila yandje onde ndjoka. Oshinima, elalakano okugongelela etungo lyegumbo lyOmuwa oshimaliwa ,” Omusita Shiimi ta ti ngawo nomukumo nokugwedha ko ta ti oku wete kutya aakwanegongalo yawo kOvenduka oye mu tegelela notashi vulika lela a ka ze ko nasha tashe etitha omukumo megongalo.