Te ya kondjelele wo oonkalamwenyo dhi li nawa molwoluhepo

OLUKANDA lwedhina Ombili mOvenduka olu shiwike nawa kaakalimo oyendji yomoKatutura nolwa kala nee lwa talikila nee methano lyonkalo ya nika oluhepo. Omanga nee olukanda ndono lwa kala lwa talikila methano lya fa mpono, aakalimo yaahoka oya tameke okuninga oonkambadhala opo ya lundulule eitaalo ndyoka lya kala po kutya ‘okukala kolukanda hoka oluhepo lwowala’. Aili Venonya oye gumwe gwomwaamboka ngoka a kala nokukambadhala oku kutha aaNamibia momapandaanda noku ya dheula ya vule okukala tayi ikwatha yoyene. U uvithwa lela nayi kwaashoka kutya aantu itaya mono iilonga patompelo ndyoka kutya ka ye na owino nuunongo nokukala nee yaa shi kutya opu na shoka tashi vulu okuningwa po opo kwe etwe omalunduluko moonkalamwenyo dhaamboka kwa talika ye li lela moluhepo. Aili Venonya onkene a li a ningi etokolo opo a tote po oshiputudhilo shomadheulo shedhina Aili Catering and Training Services CC momumvo 2010. Omadheulo haga gandjwa koshiputudhilo shoka okwa kundanekwa ga nuninwa ngaa nee unene mboka itaaya vulu okwi ifutila kiiputudhilo yopombanda moshilongo shaashi pwaa na oshimaliwa.

“Onda penduka esiku limwe na omanga nee nda li ndi ipyakidhila te lesha oshifo onde ya pokartikela kamwe taka gandja uusama kaaNamibia kutya itaya pewa iilonga shaashi oyendji yomuyo oye na ashike owino nenge uunongo uushona nenge kaa ye na sha owala.

Onda kala pooha dhomalukanda, onkene shampa nda mono aantu yaa na iilonga notaya mono lela iihuna ohandi kala aluhe nda hala oku ya kwathela opo ya mone uunongo washa. Molwashoka onda longa kohotela yaKalahari oomvula dhi li omulongo nahamano shika kungame kasha li nando oshidhigu’, Aili Venonya a yelitha naandhoka. Oshiputudhilo shoka shedhina Aili Catering and Training Services ohashi gandja nee omadheulo ngaashi mokumbaka, okuteleka osho wo yilwe ngaashi ootundi dhOshiingilisa shopetameko lela.

Okuza ngaa anuwa nkene sha totelwepo oshiputudhilo shoka sha mee Venonya osha dheula aantu ye thike pomathele ge li gatano nokwa kundanekwa ye na ngashingeyi iilonga ngaashi moPick n’ Pay, moshipangelo shaKatoolika kaRoma mOvenduka, Primi Piatti, Hilton Hotel, Africa Restaurant, Checkers, Paguel Restaurant osho wo moSpur okutumbula po ashike yimwe po. Okwa kundanekwa aadheulwa ye li omulongo nayatano ya li ya pewa oonzapo dhawo omasiku ashike ngaka nokuli poshiputudhilo mpoka mboka ya kala mootundi okuza Januali omumvo tuu nguka. “Otwa gandja wo oamdheulo kaantu ye li omulongo oshali ashike mbono twa mono ye na lela ehalo okwi ilonga ndele ka ya li ye na iimaliwa okwi ifutila. Otwe ya kongela mpoka taya ningi wo shoka hashi ithanwa omadheulo omanga wu li natango moshiputudhilo shontumba yaali yomwaamboka oye li ngashingeyi moPick n’ Pay nooyakwawo oye li ngaa mpaka naampeyaka”, Aili Venonya a ti ngaaka. Okwi indile wo kaanyasha mboka ye na lela ehalo okwi ilonga ndele ka ye na iimaliwa ye ye puuyelele opo ya vule okukwathelwa. Ta ti iimaliwa ianyi kala etompelo lyokukala inoo adha omalalakano mokukalamwenyo kwoye.

“Oshiwike sha zi ko oCheckers oya dhengelele ndje ongodhi opo ndi ya pe aalumentu mboka ya mone omadheulo ga fa mpoka ye li 10 ashike onda li mo ashike nayaali momadheulo onkene tandi indile aalumentu ye tu ndjoine wo”, mee Venonya i indile ngaaka.

Gumwe gwomaalumentu ya mona omadheulo moshiputudhilo shoka sha mee Venonya oShilumbu Fransiskus ngoka a dheulilwa onkatu nokuli yodiploma opo a adhe elalakano lye lyokuninga omutelekikamana. “Onda kala nale nondjodhi okuninga omutelekikamana naasho nee nda mono uunongo wokuteleka ngeyi ngashingeyi ote vulu nokutota po ongeshefa yandje nokuhololela po wo ooyakwetu oompito dhiilonga”, Fransiskus a tumbula ngaaka.

Oshiputudhilo shoka shedhina Aili Catering and Training Services okwa kundanekwa sha patulula iitayi yasho yi li iyali, oshitayi shimwe osha patululilwe pOniipa moshitopolwa shaShikoto momumvo 2011.

Oshitayi oshikwawo oshi li anuwa nee kOnemanya moshitopolwahogololo shaKahao naashika okwa kundanwa opo sha patululwa omumvo ashike nguka tu li.

Ngele nangoye owa hala wu ninge omutelekikamana kwatathana naye konomola yongodhi ndjika 081262621.