Ya halukithwa kondjala mOhangwena

Oswald Shivute

Uusila wa pwa po mOshikango

Photograph by Oswald Shivute

Okakomitiye haka otaka konakona unene onkalo yoshikukuta miitopolwa, miikandjohogololo nomomikunda moka mOnooli yaNamibia.
Oku ya kwako ko kOnooli, okwe etwa unene kosheetwapo shoka sha etwa momutumba gwopashigwana komupresidende gwoSWANU tate Usutuaije Maamberua, ngoka a ti kutya oshigwana mOnooli otashi si ondjala nange itashe endelelwa po otashi ka sa ngaa nee omwenyo gwomomayulu.
Oshiwike sha zi okakomitiye haka ka thikama momunashipundi gwako tate Ben Amadhila, Jesaya Nyamu, Usutuaije Maamberua (ngoka a tulile mo osheetwapo shika shoshikukuta momutumba gwopashigwana) Katuutire Kaura, Moses Amweelo, tate Simon Tjoongarero nosho wo omupopiliko gwokomitiye ndjika tate Protasius Nghileendele naanambelewa yalwe, oka talele po nee oshitopolwa shaHangwena moka ka talele po iikandjohogololo ngashi shEenhana, shaNdobe, shaShikango, Ongenga, Engela, Endola nOmulonga.
Metalelopo lyawo ndika, iilyo yomutumba gwopashigwana mbika oya lombwelwa kookaansela dhiikandjohogololo ngashi mEenhana nomOshikango kutya mOhangwena moka mu na aakalimo 245,446 omu na omagumbo ge li 28,488 ga pumbwa iikulya noonkondo. Taya lombwelwa kutya aantu nee ayehe kumwe ye li 197,735 yomaantu 245,446 oya pumbwa iikulya meendelelo.
Omunambelewa gwoshikondo shiimaliwa moshitopolwa shaHangwena tate Andrew Shileka, ngoka a pewa oshinakugwanithwa shoku ungaunga noshikukuta mOhanggwena ta ti sigo opo mpaka aaHangwena oyu uvanekelwa ashike uushako wuusila wepungu wookilohalama 12,5kg wu li 40,000 noya pewa mo ashike 32,000 sigo opo mpaka. Shika osha yela kutya moshitopolwa shaHangwena omu na aantu oyendji mboka ya inaya mona iikulya sigo opo mpaka. Shileka ota ti kutya okaupyakadhi ye na po okokutopola iikulya momikunda moka omolwiiyenditho ya kala kayi po. Ashike ota ti pokati mpoka opwe ke ya omulandu gwokulongitha iiyenditho yaakwashigwana yo taya futwa kepangelo okupitila mombelewa yomuprima moka omo hamu ungaungwa noshikukuta moshilongo.
Kaansela gwoshikandjohogololo shaShikango tate Phillip Namundjebo, okwa lombwela okomitiye ndjika kutya mOshikango otaya nana nondatu, oshoka iikulya inayi gwana nandenande. Namundjebo ta nyenyeta ishewe kutya ofooloma ndjoka hayu udhithwa koonakupewa iikulya oya tungwa po pamukalo omukukutu moku yi udhitha. Ta ti ngashi ooyene yomikunda noohamushanga yawo oye na lela uudhigu oku yu udhitha, nolundji ohadhi galulwa ko, taku tiwa kutya iandhi udhithwa nawa nadhi udhithululwe ishewe. Shika, tate Namundjebo ta ti, ohashi mana po nee ethimbo naantu otaya si ondjala omolwetokelitho ndika.
Oshinima oshikwawo, Namundjebo ta ti, iiyenditho mbyoka kayi po nawa nohaya yi nee moshigwana moka shi ya kwathele iiyenditho yokukatopola iikulya, ano omausila ngoka ge li po. Omolwomausila kaa ge po nawa, egumbo kehe ohali mono ashike okashako kamwe kuusila ko 12,5kg. Kapu na omweelelo.
Iilyo yokomitiye mokuuva ayihe mbyoka oya haluka nokululilwa konkalo ndjoka. Oshilyo Katuutire Kaura, okwa ningi epulo kutya omolwashike ando pu na okukala oofooloma oodhigu moku udhitha? Ta ti oshinima shoka osha pumbwa okutalululwa meendelelo ngashi tashi vulika. Okomitiye oya talela po wo aasindjala moshikandjohogololo shaShikango pamwe nakaansela gwa Shikango tate Phillip Namundjebo. Ya talelepo unene ngashi omushelekadhi meme Foibe Nghipunyati ngoka ya adha nuutekulu we ya lulilwa kondjala. Taya ti ohaya hupu ashike maasihenda opuwo, uuna ye ya pa sha. Ta ti ohaya ka lala inaya makela nande osha.