Omulongwa a mana oondjenda dhe sho a tindilwa eyakulo lyopaunamiti

OMULONGWA a li mondondo ontihetatu kosekundoskola yedhina Himarwa Ifete muuninginino woshitopolwa shaKavango okwa kundanekwa a mana oondjenda dhe kevi ndika sho a li a tindilwa okupangwa shaashi anuwa ka li e na okakalata ke koshipangelo. Nakusa okwa kundanwa a li e na omimvo omulongo naheyali (17), Agnes Hausiku omukalimo gwomomukunda Sikarosompo gu li moshitopolwahogololo shaMpungu. Aakwanezimo ye anuwa oya tseyithilwa nale. Okwa kundanekwa Hausiku nakahewa ke Hellen Kamanya ya li ya yi kokaklinika kaMpungu hoka ke li ookilometa dhi li mbali okuza poskola yawo mpoka konima yootundi dhOmaandaha opo ya ka mone eyakulo lyopaunamiti molwashoka ayehe ka ya li yu uvite nawa. Aalongwa ayehe mboka okwa kundanekwa kaa ya li ye na uukalata wawo woshipangelo naasho nee ye ya posenda ndjoka yuuhaku oya pewa uumbapila ashike woku ya yakulitha pakathimbo mpoka hapu taambelwa mboka taye ya ya yakulwe nee posenda ndjoka yuuhaku ashike ka wa li nee wa dhengwa oshihako, ano wa dhengwa ositombe. Uuyelele okuziilila kuKamanya, sho e ya mokandunda ekonakonotalululo posenda ndjoka yuuhaku, omupangi okwe mu lombwele anuwa kutya ita vulu okukwathela aavu kaa ye na uukalata wawo woshipangelo. Edhina nee lyomupangi ngoka kwa kundanekwa a longo iilonga ya fa mpoka inali tumbulwa nee kutya oye naanaa lye.

Kamanya naHausiku okuza mpoka okwa kundanekwa ya shuna ashike koskola inaaya mona eyakulo lyasha lyopaunamiti moluuwehame mboka yi ile ya yakulwe kokaklinika hoka. Omulongiskola gwawo Lasco Sachuma okwa ti okuza mpoka nakusa ina tya po we hwepo okuza Omaandaha ngoka nokwa kundanwa nokuli a li o ongotelele pevi mEtiyali kongulohi omanga a li ti ilongo. Hausiku okwa kundanekwa a kala ta fudha nuudhigu sho a li a falwa onkolonkolo kosenda oyo tuu ndjoka yuuhaku ashike okwa ka tseyithwa a mana nale oondjenda dhe sho pwa ka thikwa nee pokaklinika mpoka. Oonkambadhala okumona okomenda mwaashika komutalelishikandjolongo shaMpungu Mathews Kalihonda inadhi vula okwe e ta po sha shaashi ongodhi ye okwa kundanekwa ya kala ashike ya dhima mEtitatu. Sho nee a kwatathanwa naye omunambelewawiliki guunamiti moshitopolwa ashihe shaKavango omundohotola Harrison Wambungu okwa ti ina mona natango olopota kombinga yoshiningwanima shoka ashike oku uvaneke kutya ta ka ninga ngaa omapulapulo a yelithilwe nawa kwaashoka. Omuwiliki moshipangelo shaRundu omundohotola Juri Yangazov okwa ti omulandu guuministeli wuuhaku ogwe shi yeleka nawa kutya ngele omuvu ke na okakalata ke koshipangelo, nena oku na okupewa okambapila kokupangithwa ashike pathimbo ndyoka. “Ndyono epuko lela enene lya ningwa komupangi ngoka okutindila aanona mboka eyakulo lyopaunamiti. Oya li ye na oku pa aavu mboka uumbapila woku ya yakulitha ashike pathimbo ndyoka noku ya kwathela nee ngaaka”, Yangazov osho a yelitha ngawo kutya omilandu dhuuministeli wuuhaku odhi li ngiini okutalela mwaashoka sha kundanekwa.