Okulundululila aailonga aaNamibia kulwe koIndia hoka otaku pula oshimaliwa oshindji

OKWA kundanekwa tashi ka pula epangelo oshimaliwa shaamboka haya futu iifendela kepangelo shi thike poodola dhaNamibia omiliona yimwe oshinkwanu hamano (omiliona N$1,6) ngele otali yi komeho nomalongekidho okulundulula aailongi aaNamibia ye li omilongo heyali nayahamano (76) okuza kokolidji yontumba okuza koIndia oku ya fala kouniversiti yilwe koshilongo okwo tuu hoka.

Oshikondo shi na sha nokugandja iimaliwa yoku ki ilongitha shoNamibia Student Financial Assistance Fund (NSFAF) osha li sha kondema oshiputudhilo shedhina Bangalore City College koIndia hoka nokwe e ta po edhiladhilo ya lundululilwe koshiputudhilo shilwe shedhina JSS University hoka ku na olukalwa lu li ngaa hwepo shi vulithe koBangalore City College. Oshikondo shika shoNSFAF osha li sha ndhindhilike uupyakadhi mboka sho sha kuthile etalelopo oku ya koIndia hoka nokumona nee kutya pehala mpoka pwa kala aailongi aaNamibia mboka tayi ilongo koshiputudhilo hoka ka li li nando opamuthika.

Etalelopo ndyoka olya li wo nelalakano okutala tuu ngele iiputudhilo yimwe po oya taambiwa ko tuu pamilandu ndhoka dhi li po opo ya vule okugandja omadheulo goongushu kaailongi aaNamibia. Ngele aailongi mboka otaya lundululilwa nee koshiputudhilo shilwe nena iilongwa mbyoka ya adhika ya mana nale koBangalore City College otayi ke ekelwahi ashike omanga nee kwa tegelelwa epangelo li ka gandje oshimaliwa shi li pokati kooN$700,000 nomiliona N$1,6 shi ikwatelela kutya aailongi mboka ya kwathelwa pashimaliwa koNSFAF otayi ilongele shike.

Einyengo ndika ndyono kwa li kwa lopotwa lya li inaali tseyithilwa aailongi otali pula epangelo li futile omumvo gumwe komeho gwa gwedhwa po kaailongi yamwe po mboka ya adhika ya mana nale omailongo gawo noshiputudhilo shoka shoBangalore City College.

Omuwiliki gwoNamibia Qualifications Authority Frans Gertze okwa ti oshiputudhilo shoka shoBangalore City College osha taambiwa ko okutala kokugandja omadheulo kaailongi mboka ashike etokolo okwi inyengithila aailongi mbaka koshiputudhilo shilwe osha landula kegandjo lyomadheulo ge li lela pondondo yopevi noshilongo osha hala aailongo mboka ya mone omadheulo gongushu lela pondje yoshilongo mpoka ye li tayi ilongo.

Uuministeli welongo owa ti omapulo shi na sha naashika nagu ukithwe koshikondo shoka shi na sha nokugandja iimaliwa yokwi ilongitha kaailongo shoNamibia Student Financial Assistance Fund (NSFAF) ashike sho nee oshikondo shika sha kwatathanwa nasho mboka haya longo shi na sha niikundaneki inaya vula okumonika ya komende kwaashika.

Omunambelewa gumwe muuministeli welongo okwa koleke elundululo lyaailongi mboka ashike ka li a hala okutumbulwa kedhina.

Okwa kundanekwa aailongi yamwe po hoka inaaya nyanyukilwa etokolo ndyoka noya shangela anuwa omukanda uuministeli welongo noyu uvite otaya thiminikilwa melundululo moka. Momukanda moka ngoka gwa monika wo koshifo shoThe Namibian ogu ulika kutya aailongi oya tila kutya otashi vulika ya ka thiminikilwe ya ka pewe iilongwa ya pamba uunamiti koshiputudhilo shoka shoJSS University shaashi ka ku na okwi ilongela shi na sha nuutolinkundana (Journalism), yi na sha nomapindiko (Commerce) osho wo nee shi na sha nokwe e ta po iizalomwa yopamoode lela (Fashion).

Yamwe yomaailongi mboka kwa kundanwa hayi ifutile yoyene nayo oya tila wo kutya ngele oya lundululilwa koshiputudhilo shilwe otashi ke e ta omaupyakadhi ogendji ya totha mo ngaa nee ndyoka lyuuthemba wokupitikilwa okwi ilonga koshilongo hoka. Omumvo gwa zi ko uuministeli owa lopotele kutya owa gandja epitikilo ku longithwe oshimaliwa shi thike poomiliona N$512 mokugandja iimaliwa yokwi ilongitha kaailongi nomvula ndjika andola okwa kundanekwa tali ka longitha oshimaliwa shi thike poomiliona N$600 okugandja wo omakwatho goshimaliwa shokwi ilongitha kaailongi ya yooloka.