Iihokolola ya undulilwa komeho

IIHOKOLOLA iinene yekengelelo nuulingilingi mbyoka yi li mompangu oya undulilwa ishewe komeho mOmpangu yOpombanda moVenduka oshiwike sha yi.

Iihokolola mbyoka oya undulilwa sigo oku April nuumvo opo pu tegelelwe etokolo lyompangu omanga mboka taya lundilwa ya pogola miipotha mbyoka ina ya hokololithwa nokupulwa ya ulike okwaana ondjo kwawo. Iihokolola mbika oyaantu yaheyali mekengelelo aniwa lina sha nehangano lyoSocial Security Commission mekano lyiimaliwa ya pelwe ehangano epunguli lya Avid Investments, iihokolola iitiyali oyaantu yatatu taya lundilwa ya kengelela Oshikondo shIimaliwa oodola oomiliona odhindji melando lyomashina gokukonakona iinima poongamba. Omashina ngoka gonte ya X oga landelwe oku za kehangano lyoko China.
 Iihokolola mbika oya tegelelwa ngashingeyi yi ka pulakenwe mesiku 11 April nuumvo.Ngele ohofa oya gandja etokolo miinima mbyoka ya li ta yi patanekwa kaafekelwa miipotha mbika iyali, nena iihokolola yoyene yokuhokololitha aatamanekwa otashi vulika yi tameke muApril nuumvo. Aafekelwa moshinima shekano lyiimaliwa yoKomissi yoSocial Security oya pula Ompangu Onene yoshilongo opo yi gandje etokolo kombinga yoshitopolwa shOmpango yiilonga yomuyonena shoka shina sha noshinima shekengelo.
Omanga aafekelwa moshinima shomashina gonte ya X poongamba oya tegelela Ohofa yOpombanda yi tokole kepulo lyawo ngele iitopolwa moveta yokukondjitha uulingilingi noshowo ndjoka yokukondjitha nokukeelela iilonga yomiyonena ya longekidhwa ota yi tsu kumwe nekotampango lyoshilongo.Mboka ya tegelela etokolo ndika oyo oshilyo shoKomissi yiilonga yepangelo, Teckla Lameck nehewa lye mongeshefa, Kongo Mokaxwa nomukwashigwana gwa China Yang Fan.

---