Epangelo lya manapo ookondoma aniwa

UUMINISTELI Wuundjolowele aniwa owuna uudhigu okugandja ookondoma dhoshali, konima yokweetha okulanda ndhika komuhambudhi gwadho gwomoshilongo.

Otaku kundanekwa kutya oshikondo shika osha tokola ngaaka oshoka ookondoma dhomoshilongo aniwa odhinondilo.O The Namibian oya kundana kutya Uuministeli mboka owa manapo ookondoma ihaadhi landwa kaalongithi konima yokuhulithapo euvathano lyawo nehangano lya Commodity Exchange[ComEX]. Opena ishewe ehokololo kutya Uuministeli owo tuu mbuka owa shuna ishewe ku ComEx opo a kwathele okugandja ookondoma dholudhi lwo Smile ndhoka aniwa dhiholike , nohadhi longwa kehangano ndyoka.
Uuministeli wUundjolowele aniwa owa mwenene, okulanda ookondoma okuza ku ComEx, sho wa thiminikwa okushi ninga kehangano lya Global Fund, ndyoka taku tiwa olya ti ookondoma dha longwa moNamibia odhina ondilo.Onkene Uuministeli wUundjolowele owa li wa hogolola okulanda ookondoma okuza komahala ngoka dhina ombiliha ngaashi ko India no Malaysia.
Uuministeli aniwa konima yokuhulithapo euvathano lyawo na ComEx okulanda ookondoma, owiiyadha  tawu hala okumanapo ookondoma ndhoka hadhi gandjwa oshali.
Otaku hokololwa kutya ngashingeyi owa shuna ishewe ku ComEx opo nguka a kale natango ta longo ookondoma ndhoka, oshikondo shika sha kala nokulanda.

---