Nabta a kaleka ekanka lyootekisa

EKANKA ndyoka lya li lina okuningwa kiilyo yehangano lyuumbesa nuutekisa lya Namibia olya kalekwa.

Ekanka olya li lya thanekwa li ningwe omaandaha ongula onene, ihe ewiliko lyehangano ndika Nabta olya tokola okuli kaleka. Ekaleko lyekanka olya ningwa konima sho ewiliko lya Nabta lya tsakanene nokukundathana nopolisi noshowo naanambelewa yUuministeli Wiiyenditho.
 Opolisi oya li woo ya gandja elondodho kutya yo ita yi ka idhidhimikila evundakano ndyoka kwali tashi vulika li holoke ngele ekanka olya yi komeho. Aahingi yiiyenditho yokututa aantu molwa ofuto oya li ya tilitha kutya otaya ka ninga ekanka oku holola omadhiladhilo gawo kombinga yegwedhelo lyoondando dhoofuto uuna omuhingi nenge omulongithi gwondjila a pogola. Nabta niilyo ye oya nyenyeta kutya oondando ndhoka odhili unene pombanda na ishewe aniwa sho dha tulwa miilonga ehangano niilyo yalyo kaya li ya kundathanwa nayo.
 Pamautho ngoka omape, ngele omuhingi okwa kwatwa ta hingi iniimangelamo nenge ta popi mongodhi yopeke keena okambako hoka kamanguluka, ota futu  oodola omayovi gaali. Odalaiva ndhoka dha ndopa okuthikama pehala lya ulikwa kutya na pa thikamwe ota yi futithwa oodola 1 500 ngele oya zimine ondjo yayo, omanga egeelo lyomuhingi ngoka a tindi okuthikama pelamba etiligane olyo oodola 3 000.
 Omukuluntu gwomiya dhashinana dha Namibia, Leitenanda Ndjayi, Sebastian Ndeitunga etitano okwa lombwele oshigongi shiikundaneki kutya nonando iilyo ya Nabta oyina uuthemba okuholola omadhiladhilo gayo noku ninga ekanka, opolisi ita yi kiidhidhimikila omaihumbato gaa li paveta.
 Okwa tile opolisi ita yi kiidhidhimikila omaihumbato ngoka ta ga yi moshipala einyengo lyiiyenditho yilwe. Okwa tile kutya ye ina hala oku mona aantu ta ya hilwa miiyenditho molwaashoka mbika oyi na okukala mekanka. Okwa dhimbulutha Nabta kutya oompango odha tulwa po oku landulwa kwaa yehe na ishewe odhi lipo opo dhi gamene oshigwana, nongele tadhi tulwa miilonga otadhi tulilwamo kehe omuntu, mwakwatelwa naahingi yootekisa nuumbesa.
 Okwa ti woo opolisi ya Namibia oyo aapiya yoshigwana ashihe pwaana ndjoolola. Ndeitunga okwa ti okwa tsakanene nomuperesidende gwa Nabta, Magnus Nangombe noshowo naanambelewa yUuministeli wiiyenditho, poshigongi shoka Nangombe okwa li a nyenyeta kutya yo inaya pulwa ya gandje omadhiladhilo gawo kombinga yiifuta mbika iipe, oshoka oyendji yaahingi yootekisa noshowo yoombesa otaya futithwa unene tuu sho taya londekele pomahala ngoka inaa ga pitikwa oku londekela aafaalelwa.
 Okwa ti aahingi mbaka ota ya longo ngaaka oshoka aniwa kapena omahala gopambelewa mpoka yena okutsilikila aafaalelwa yawo, oshoka omalelo giilando inaga tulapo omahala ngaashi ngoka miilando oyindji yoshilongo. Nabta onkene okwa indile opo etulo miilonga lyoofuto ndika li kalekwe manga sigo uuna ndoka pwa tulwa omahala ngoka haga ithanwa “ootaxi rang” nenge omahala gokulondekela.
 Ndeitunga kombinga ye okwa ti oofuto ndhoka otadhi kala natango miilonga shiikwatelela koonkundathana pokati koombelewa dhUuministeli wiiyenditho, Uuyuki, Omapangelo giilando, ombelewa ya Hahende gwoholomende, noshowo ombelewa yOpolisi yoshilandopangelo.
 Nangombe okwa lombwele oThe Namibian kutya ekanka olya kalekwa oshoka oya gandja omanyenyeto gawo kaakwanepangelo ye ga pulakene noku ga monena eyamukulo. A gwedha ko tati konyala omapulo gawo ogendji oga mona omayamukulo geli nawa.

---