Bullet a galuka netegameno

ONGUNDU yopamithigululwa kalo yedhina Bullet oya ningi oshigongi shayo shotango shoonkundana metitano konima sho ya galuka okuza ko South Africa hoka ya li ya kuthombinga mokwiimba puudhano wekopi lyuuyuni .

Ongundu ndjoka ha yi imbi iiyimbo yoshiHerero , ngaashi ha yi ithanwa Oviritje no ha yi zala omizalo dhOvahimba oya hokiwa kaatali oyendji unene konima sho iiyimbo yawo ya li ya ulikwa motelevisi, omanga mbaka ya li taya imbi.

Aalongekidhi yuudhano wekopi lyuuyuni oya li ya hogolola oongundu dhomithigululwakalo dhaAfrica opo dhi kalelepo omanenevi guuyuni.Bullet okwa li a hogololwa a kalelepo enenevi lyAmerica lyuumbugantu.

Peegululo lyuudhano mo 11 ga Juni nuumvo , Bullet okwa imbi nokudhana komeho gaantu yeli omayovi 25 000, na okwa ulike kutya oku holikwe kaatali nokwa ka indilwa ishewe opo a imbe pethimbo lyoshituthi shetanga sho tashi edhilwa.

Ndele ongundu ndjika inayi vula okushininga molwaashoka oombapila dhayo  dhokukala mo South Africa ina dhi vula okulelepekwa onkene oya galukile kegumbo omanga uudhano wa hugunina inaa wu dhanwa.

Pahapu dhomuwiliki gwongundu, Masatu Thom, aalongekidhi yekopi lyuuyuni ta li landula ndyoka ta li ka kala ko Brazil oya ningi euvathano nale nongundu ndjika opo yi ka dhane puudhano mboka momayuvi 2014.Ongundu ndjika ota yi ka imba nokudhana pOpuwo mo 23 no 24 ga July nuumvo.

---