Omufekelwa ta dhimbulukwa edhipago meihokololo

OMUSHANGWA ihokololo moka, Paulus Kamati a li a zimine kutya okwa kutha ombinga medhipago lyomutalelipo omuNdowishi, Johannes Fellinger momilondo dha Khomas ogwa taambwa ongo uumbangi mompangu.

Eihokololo lya Kamati [29] noshowo omushangwa ngoka ta gu hokolola nkene a ulike ehala mpoka pwa ningilwa edhipago, olya taambwa kompangu moshipotha moka Kamati nomutamanekwa omukwawo, Fanuel Festus Shipanga [40] taya pulakenwa komupanguli ta yakula, Dinah Usiku moWindhoek metine.
Kamati nomupolisi nale Shipanga, oya ti ka yena ondjo moshinima shika.Otaya tamanekelwa  edhipago, eyugo noshowo ekwatombambyona, nokukala nondjembo niikuti yawo yaana epitikilo.
Ota ya lundilwa kutya oya ponokele aatalelipo Aandowishi, Johannes Fellinger[56] noshowo omukadhi , Elke Fellinger popepi nomakulukuma ga Von Francois Feste kuuninginino wa Windhoek mu 8 ga Juli 2007. Fellinger okwa si sho a yahwa momutse.Omukiintu gwe okwa kwatwa ombambyona kaafekelwa, mboka ya hingi naye pamwe nomudhimba gwomulume, mosheenditho shoka aatalelipo mbaka ya li ya hehela  sho ya thikile moNamibia okuza koshilongo shawo.
Meme Fellinger okwa hokololele ompangu kutya  okwa kala muukwatwa, waafekelwa mbaka uule wootundi ntano, omanga yo Kamati na Shipanga inaa ya fadhukila po miikulundundu ya Khomas konima sho ya kandomitha osheenditho shoka mondjila yoomanya. Shipanga okwa kwatelwe mu 3 ga August 2007, omanga Kamati okwa kwatwa konima yomwedhi gumwe mo 14 ga September 2007. Kamati aniwa okwa li a hokolola komeho gomupolisi  a ya mopenzela, omukonakoni omukuluntu, Derek Brune konima yokukwatwa kwe. Konima yomasiku gatatu nguka aniwa okwa ka ulikila omupolisi, Hermie van Zyl ehala mpoka iilonga yuudhudhu mbyoka ya longelwa.
Aapolisi mbaka kaye shi oshitopolwa shekonakono lyoshipotha shika.
Meihokololo ndyoka Kamati a gandja ku Brune, ye okwa ti “Bafana” oye aniwa omuntu ngoka  a dhipaga Fellinger na, oye a wilike iilonga ayihe yiikulumuna mbyoka mbaka ya longo.
Omanga inaa ulika ehala mpoka pwa longelwa epogolo ndika ku Inspecta omukuluntu van Zyl, Kamati aniwa okwa ti edhina lyolela lya ‘Bafana ‘olyo, Fanuel Shipanga. Pampango ngele Kamati ina endulula ehokololo lye ndika nokugana nena ndika ita li vulu okulongithwa ongo uumbangi okugeelitha Shipanga.Kamati aniwa okw a lombwele Brune kutya, ‘Bafana’ okwa li te mu pe iilonga mofaalama omasiku gaali omanga oshiningwanima shika inaashi ningwa.Iilonga mbyoka aniwa ine ke yi pewa, ndele aniwa ‘Bafana’ okwa kala temu tilitha, opo ye a longe ngaashi te mu lombwele.
Kamati okwa tile aniwa ‘Bafana’ okwe mu lombwele kutya oku na oku ninga ngaashi temu lombwele , oshoka ngele hasho ye ote ke mu ningila nayi osho a hokololele, Brune.
Okwa tsikile tati ‘Bafana’ aniwa okwe mu lombwele ta ti ngele ina hala ote mu dhipaga, na ota si oye awike, no kapena ngoka te ke shi hokolola.
Kamati okwa hokolola kutya omatilitho okwe ga ningilwa konima sho ‘Bafana’ ngoka a li ena oombistoli ndatu e mu pe aniwa omuzalo omukulu gwopolisi  opo aniwa egu zale.
‘Bafana’ aniwa okwa kwata omukiintu komulungu gwondjembo nokwa lombwele Kamati opo a kale puye, osho a hokolola.”Bafana okwa lombwele ndje ndikale nomukiintu nguka, nepuko kehe ta tu ningi ote tu dhipaga atuhe. ‘Bafana’ okwa yi komulumentu, konima yokathimbo ondu uvu etopo lyondjembo, na ‘Bafana’ okwa ithana ndje ndiye kuye. Onda uvu ishewe omitopo mbali, ngame no nda yi pamwe nomukiintu, mpoka twaadha ‘Bafana’ a humbata omulumentu opo emu tule mosheenditho, Kamati osho a hokololele Brune.
Konima yokuhinga naantu mboka yaali, yaakwiilongo, Kamati okwa ti- ‘Bafana’ aniwa okwa kankameke osheenditho, nokwa lombwele Kamati a opaleke osheenditho, osho Brune a li a hokololelwa.
‘Bafana’ aniwa okwa  hilimo omudhimba gwa Fellinger mosheenditho nokwe gu kookololele miihwa konyala oometela omilongo mbali.Pethimbo ndyoka omulumentu nguka okwa adhika a sa nale.Okwa hokolola ishewe kutya konima sho osheenditho shoka sha kandoma Kamati na ‘Bafana’ aniwa oya ende eta ya shuna ko Windhoek, hoka ya yi ya ka holama.
Okwa gwedha ko ta ti”’Bafana’ okwa londodha ndje kutya ngele onda hokololele omuntu, otashi ka kala uupyakadhi wandje ongame andike, ndele kawu shi iilonga ye- okwa ti otandi ka tulwa mondholongo uule womimvo 200”, Kamati osho a hokololele Brune.
Omukulukadhi Fellinger okwa mana oku gandja uumbangi we metitano . Okwa lombwele aanampango taya popile aatamanekwa kutya okwa dhimbulula aafekelwa mbaka yaali momafano ngoka ga li ga nyanyangidhwa, moshifo sho shindowishi, Allgemeine Zeitung, konima sho mbaka ya li ya kwatwa.
Okwa ti mokudhimbulukwa kwe okuwete natango aalumentu mbaka yali  yeya ponokele pamwe nomulume, naamboka ya li ye mu kwata ombambyona uule wootundi ntano, monkalo yetilo lyeso, okwa ti mbyoka oyo iipala ya Shipanga na Kamati, osho Fellinger a popi sigo opehulilo.Oshipotha otashi tsikile oshiwike shika.

---