Omukwati nkonga a fadhukapo konima yepangulo

OMUKWATINKONGA ngoka a li iiyaka mondjedhililo yopolisi poSwakopmund, uule wesiku limwe okwa kwatwa ishewe na okwa shunwa mondholongo.

Reinhard Tjitandi [23] okwa pelwe egeelo lyondholongo yomimvo 10 mompangu yoshitopolwa ya Swakopmund, kumengestrata, Gaynor Poulton, sho a monika ondjo yokukwata omukiintu koonkondo moSwakopmund mo 10 ga April 2005.Okwa hokololwa kutya ye okwa li a undulile omukiintu nguka pevi, a kambadhala oku mu ponda  omanga inee mu kwata onkonga momukunda gwa Tamariskia.
Konima yoku pewa egeelo, Tjitandi okwii yaka mo mondjedhililo yopolisi moka a li a falwa omanga inaaka lundululilwa kondholongo ya Swakopmund.
Ota ku fekelwa kutya Tjitandi okwa li a holama mendoloma enene lyiiyagaya, ndyoka lya li lya ka tilwahi komunandholongo omukwawo gumwe pondje yoshitaasi shopolisi.Tjitandi okwa ka kwatwa ishewe esiku lya landula. Ota ku tiwa shika hasho oshikando shotango omuntu nguka ta iyaka mondjedhililo. Omukalimo gwomomukunda Omatjete, moshilando shOmaruru okwiigilila okwiiyaka mondholongo.
Okwa tegelelwa ishewe a ka holoke mompangu mo 15 Juli nuumvo metamaneko ekwawo lyekwato lyonkonga, eteyo lyegumbo nelalakano lyoku kwatonkonga.Ota tamanekwa nokulundilwa kutya okwiiteyele megumbo limwe pOmatjete konyala omimvo ne dha piti me 15 lya Juni 2006 nokwa kwata omukiintu gumwe ishewe koonkondo.Pethimbo ndyoka okwa li pondje yondholongo iifutilamo.
Tjitandi okwa li a ti ke na ondjo moshipotha shoka, aka monika ondjo.
Poulton okwa tsukumwe nomutamaneki , Hermina Apollus kutya epangelo olya gandja uumbangi pwaana omalimbililo kutya Tjitandi okwa kwata omukiintu omugundjuka koonkondo moTamariskia.

---