|
|
|
|
|
|
|
|
|
|
|
You Are
Here: |
Local News|
Wednesday, February 20, 2008 - Web posted at 8:23:57 GMT SWAPO na RDP ya tula miilonga iikonga yawo yomahogololo pEenhana OSWALD SHIVUTE pEENHANA O NGUNDU yoSwapo nosho wo ndjoka ompe yoRally for Democracy and Progress RDP, mehuliloshiwike lya zi ko oya tula miilonga iikonga yawo yomahogololo moshikandjohogololo sha Eenhana mOshitopolwa sha Hangwena. |
|
Kombinga yoSwapo, Omuprsidende gwOpevi gwoSwapo, Omundohotola Hage Geingob, oye a tula miilonga oshikonga shawo shomahogololo mEenhana omanga kombinga yo RDP, Omupresidende manga gwOngundu ndjika Omusamane Hidipo Hamutenya oye e shi tula miilonga pambelewa. Moshikandjohogololo sha Eenhana, otamu ka ningwa omahogololo gopokati pehulilo lyOmedhi tagu ya, ano lya Maalitsa, taku tiwa kutya ometi 29 Maalitsa 2008, opo Aanashikandjohogololo shoka sha Eenhana ya ka hogolole Kansela gwawo omupe, ngoka e na okuya pehala lya Kaansela omukulu gwOshikandjohogololo sha Eenhana tate Karlous Max Shinohamba ngoka meti 31 Januali omvula ndjika a thigi po oshipundi shoka shUukansela mOshikandjohogololo shEenhana molwashoka aniwa okwa hala e kiigwedhele ko keilongo lye ko Australia. Swapo okwa ulika Omuunganeki gwayo mOshitayi sha Hakambaba mEenhana Nehemia Haufiku Omuhogololwa gwayo momahogololo moka, omanga RDP a ulika omusamne Thomas Ndiwakalunga ngoka e li Omuujnganeki gwo RDP mOshikandjohogololo sha Eenhana oye a ka thikame momahogololo ngoka gomesiku lya tumbulwa metetekelo. Oshigongi sho Swapo osha ningilwe mEtitano lya zi ko, omanga shoka sho RDP sha ningilwe mOlyomakaya ngaka ga zi ko. Omupopi omunene moshigongi shOswapo okwa li Omupresidende gwOpevi gwoSwapo omusamane Hage Geingob omanga omupopi omunene sha RDP a li Omupresidende manga gwo RDP Hidipo Hamutenya. Iigongi ayihe oya li ya kalwa kengathithi lyiilyo naayambidhihdi yawo, ashike nee shoka sho RDP, osha li sha kalwa kaantu kiilyo nokaayambidhidhi yayo oyendji shi vulithe. Aaenhana oya li ya kumwa lela kengathithi enenenene lyo RDP. Taya ti inaye shi mona nale na kaya li ye shi kutya RDP oku na aantu oyendji ye thike mpoka. Koyendji osha li sha yela lela kutya mOshitopolwa shoka sha Hangwena RDP oku na mo eyambidhidho enenenene, unene tuu oku shi talela mpoka kutya aanashilonga oyendji, yoondondo dhopevi nodhopombanda, oya ndjoina oRDP nani moshitopolwa shoka. Pethimbo ta wilike oshigongi shoSwapo pEenhana mpoka mEtitano, Oministeli yOomina nOmalusheno, Errki Nghimtina, okwa ti kutya Oshitopolwa sha Hangwena oshoSwapo na kashi nna okukala shOongundu dhilwe dhi ili nande esiku limwe. Oshi li notashi ka kala Oshitopolwa shoSwapo. Ta ti kamu na Ookaansela yaashi yoSwapo. Ta indile kAaenhana ya ka ye komahogololo ngoka ga tumbulwa ya ka hogolole Kansela gwawo omupe pehala lya Shinohamba. Ta tik khe gumwe na konaakone mboka pu na okakalata ke komahogololo nokukala wo e na opena yi li nawa, esiku ndyoka. Geingob naye wo osho a ti ngawo pethimbo ta ulikile AakwaSwapo omuhogololwa gwawo. "Ohangwena, oya mangululwa koSwapo ngashi ngaa Iitopolwa yilwe moNamibia, na itatu ka pitika nade yi ningwe evigumbo, ngashi aantu yamwe ya hala notaya piygana," Oministeli yElongo Nangolo Mbumba ta ti ngawo pethimbo a pewa ompito a ithane Omupresidende gwOpevi gwOswapo Hage Geingob e ye a popithe oshigwana mpoka. Omapopyo ga kala po otaga ti kutya Ongundu yo RDP ongundu yAakwanyama nenge yAanashitopolwa sha Hangwena ashike opuwo noyi li ano ngeyi paukwamuhoko. Shika Omupresidende manga gwoRDP Hidipo Hamutenya yo na Amushangandjayi manga gwo RDP Jesaya Nyamu, oye shi ekelehi kokulekule. Taya ti kutya mbyoka iifundja iitokele too, tayi taandelithwa kaatsindumbo yo RDP. Hamutenya ta ti kutya sho ya toto po RDP pwa pita ngashiingeyi oomwedhi ndatu ne lwaampoka, aatsindumbo mbaka oya kala taya ti kutya okangundu hoka ko RDP, oke na okuteka po mbala, itaka yi kokule. Ashike sho ya mono kutya RDP okwa kola nota pula komeho, ngashiingeyi otaya nyateke RDP nokutya aniwa ongundu yopaukwamuhoko. "Onda hala oku ya lombwela kutya RDP ongundu yOpapolotika ya Namibia, yAanamibia, ya kola, tayi pula komeho noye ya okukalelela moNamibia nelalakano lyokupangela Namibia, oshoka Swapo oya kanitha ondjila mokupangela Namibia" Hamutenya ta ti. |
|
||||
PO Box 20783 - Windhoek - 42 John Meinert Street Tel: +264 (61) 279600 - Fax: +264 (61) 279602
|
